حیدر آباد ( نیوز رپورٹ )حیدرآباد میں عوامی مارچ سے خطاب کرتے ہوئے بلاول بھٹو نے کہا کہ وزیر اعظم قوم سے خطاب کرنے والے ہیں، اسمبلی توڑ دیں ہم الیکشن کے لئے تیار ہیں۔ وزیراعظم خطاب میں انتخابات کا اعلان کریں، ہم تیار ہیں، ابھی دوسرا دن ہے، ابھی سے بنی گالا کی چیخیں نکل رہی ہیں، 8 مارچ کو اسلام آباد پہنچیں گے تو انہیں ضرور جانا ہوگا۔ خود اسمبلی توڑو، مستعفی ہوجاؤ، ورنہ جیالے اسلام آباد آرہےہیں، خود چلے جاؤ، ورنہ ہم گھر بھیج دیں گے، عدم اعتماد کا وقت آچکا ہے، وقت آگیا ہے کہ سلیکٹڈ کو گھر بھیج دیں۔
بلاول بھٹو زرداری نے کارکنان سے خطاب کے دوران کہا کہ آپ نے ہمیشہ پاکستان پیپلز پارٹی کا ساتھ دیا ہے، میں ایک بار پھر آپ کی مدد اور آپ کا ساتھ مانگنے آیا ہوں، ملک کے عوام کے لئے جدوجہد کررہے ہیں، غریب، مزدور، کسان اور طالب علموں کے لئے جدوجہد کررہے ہیں۔ معاشی بحران میں ایک ہی
جماعت پیپلز پارٹی آپ کے ساتھ کھڑی ہے، سندھ حکومت نے مزدوروں کی کم سے کم اجرت سب سے زیادہ رکھی، ہم سے کہا جارہا ہے کہ ہم مزدور کی تنخواہ میں اضافہ نہیں کرسکتے۔ پیپلز پارٹی آج بھی کسان کے لئے جدوجہد کررہی ہے، پیپلز پارٹی ہاری کی لڑائی لڑرہی ہے، پانی کے بحران پر پیپلز پارٹی احتجاج کرتی ہے۔ پی پی چیئرمین نے مزید کہا کہ ٹڈی دل کا حملہ ہوا تو حکومت نے کچھ نہیں کیا، آصف زرداری نے پارلیمان میں کہا کہ ٹڈی کے حملے سے کسانوں کو بچایا جائے، آمر ضیا نے طلباء یونین کا حق چھینا تھا، ہم نے طلباء یونین کو بحال کیا۔
بلاول بھٹو نے کہا کہ ہم مہنگائی کے خلاف احتجاج کررہے ہیں، غربت بے روزگاری کے خلاف احتجاج کررہے ہیں، جب سے پی ٹی آئی ایم ایف بجٹ آیا ہے ہم جدوجہد کررہے ہیں، پی ٹی آئی ایم ایف ڈیل سے نکلنے کیلئے عمران کو گھر بھیجنا ہوگا، صاف شفاف انتخابات کرانا ہوں گے، عوامی حکومت لانا ہوگی، ایسی عوامی حکومت بنائیں جو غریب دوست معیشت بنائے۔ آپ کا جوش دیکھ کر کٹھ پتلی نے گھبرانا شروع کردیا ہے، کٹھ پتلی نے کچھ وزیر بھیجے ہیں، جائیں سندھ حقوق کیلئے مارچ کریں، کون کٹھ پتلی کو سمجھائے گا کہ سندھ کے حق پر تم نے ڈاکا مارا ہے، سندھ کے پانی اور گیس پر ڈاکا تم نے مارا ہے، تم نے این ایف سی ایوارڈ پر ڈاکا مارا ہے، پنجاب، بلوچستان، آزاد کشمیر کے ساتھ ناانصافی کی ہے۔یہ تماشے نہیں چلیں گے، حساب دینا ہوگا، وزیراعظم پریشان ہوگیا ہے، وہ بزدل ہے، میڈیا پر پابندی لگارہے تھے کہ وزیراعظم کے خلاف نہ بولے، آرڈیننس نکالا ہے کہ جو بھی سوشل میڈیا پر گالی دے گا اسے پانچ سال سزا ہوگی، خود گالی دے جو چاہے بولے، محسن بیگ سے ایک لفظ نکلا تو اسے مارا پیٹا، یہ کس قسم کا بزدل وزیراعظم ہے جو تنقید برداشت نہیں کرسکتا۔
پی پی چیئرمین نے مزید کہا کہ عمران خان نے آٹا، پانی، گیس چوری کیا اور دوسروں پر الزام لگا دیتا ہے، گوادر پورٹ بن رہا ہے تو شکریہ صدر زردای، اس میں عمران کا کیا کمال ہے، بینظیر کارڈ سے بینظیر کا نام مٹاکر سمجھتے ہو یہ آپ کا پروگرام ہے، یہ بی بی کا پروگرام ہے، یہ پیپلز پارٹی کا پروگرام ہے۔
