بہاولپور(بدلو نیوز ) بلاول بھٹو نے وزیر اعظم عمران خان کو استعفیٰ دینے کے لیے 5 دن کی مہلت دے دی۔ تفصیلات کے مطابق پاکستان پیپلز پارٹی کے چیئرمین بلاول بھٹو زرداری نے پنجاب کے شہر بہاولپور میں عوامی مارچ سے خطاب کرتے ہوئے کہا عمران خان کے پاس 5 دن کی ڈیڈ لائن ہے، وہ اس دوران خود ہی استعفیٰ دے دیں۔پی پی چیئرمین نے کہا ‘اگر آپ نے استعفیٰ نہ دیا تو پانچ دن بعد ہم اسلام آباد پہنچ کر عدم اعتماد لائیں گے۔’
بلاول نے کہا عمران خان، عوام اپنا فیصلہ سنا چکی ہے کہ وہ آپ کو وزیر اعظم نہیں مانتے، آپ کے پاس پانچ دن ہیں، اگر غیرت ہے تو خود ہی مستعفی ہو جائیں، نہیں تو پانچ دن بعد ہم عدم اعتماد کی تحریک لے کر آئیں گے اور آپ کا بندوبست خود کریں گے۔ انھوں نے کہا اگر آپ میں ہمت ہے تو اسمبلی توڑیں، الیکشن کرائیں اور مقابلہ کریں، ہم دکھائیں گے کہ عوام کس کے ساتھ ہیں، 5 دن بعد ہمارے نمبرز پورے ہو چکے ہوں گے۔ ہم عمران خان کو ہٹا کر صاف و شفاف الیکشن کرائیں گے، اور عوام ہمارا ساتھ دیں تو اسلام آباد پہنچنے سے پہلے ہی خوش خبری آ جائے گی۔
46
