آکسفورڈ ( آواز خلق ) سائنس دانوں نے سولر پینل سے دگنی صلاحیت والی، سیل فون سمیت کسی بھی شے کی سطح پر لگنے کے قابل حیرت انگیز اور جدید ترین سولر کوٹنگ ٹیکنالوجی تیار کر لی۔ ایک نئی تحقیق کے مطابق آپ کے بیگ، سیل فون یا کار کی چھت پر ایسی کوٹنگ کی جا سکتی ہے جو سولر پینل کے مقابلے میں کہیں زیادہ مقدار میں سورج کی توانائی کو جمع کر سکے گی۔آکسفورڈ یونیورسٹی کے شعبہ طبیعیات کے سائنس دانوں نے روشنی جذب کرنے والا ایسا حیرت انگیز مواد تیار کیا ہے جو کسی بھی عمارت یا شے کی سطح پر اسپرے کیا جا سکتا ہے، یہ موجودہ شمسی پینل سے تقریباً دگنی توانائی پیدا کرنے کی صلاحیت رکھتا ہے۔
اس سولر پینٹ کو سولر کوٹنگ یا فوٹوولٹک پینٹ بھی کہا جاتا ہے، یہ قابل تجدید توانائی کی ٹیکنالوجی میں ایک انقلابی پیش رفت ہے۔ یہ روزمرہ کی سطحوں کو توانائی پیدا کرنے والے اثاثوں میں تبدیل کر کے روایتی سولر پینل کو بہت پیچھے چھوڑ دیتا ہے۔ اس جدید پینٹ میں فوٹو وولٹک عناصر شامل ہیں جو سورج کی روشنی کو پکڑ کر اسے قابل استعمال بجلی میں تبدیل کر سکتے ہیں۔
یہ سولر کوٹنگ پیروسکائٹس نامی مواد سے بنی ہے، جو دراصل کیلشیم ٹائیٹینئم آکسائیڈ منرل ہے، سولر پینلز سیلیکون پر مبنی ہوتے ہیں اور اس کے برعکس پیروسکائٹس سورج کی توانائی کو جذب کرنے میں زیادہ مؤثر ثابت ہوا ہے، کیوں کہ اس میں سورج کے اسپیکٹرم سے روشنی کی ایک وسیع رینج کو جذب کرنے کی صلاحیت ہے، یعنی زیادہ روشنی کا مطلب زیادہ توانائی ہے۔
59
