واشنگٹن ( آواز خلق ) وائٹ ہاؤس کی قومی سلامتی کے ترجمان جان کربی نے کہا ہے کہ اگر ایران نے اسرائیل پر حملہ کیا تو امریکہ اسرائیل کے دفاع کے لیے بھرپور ساتھ دے گا۔ غیر ملکی خبر رساں ادارے کی رپورٹ کے مطابق اسرائیل کے ایک نجی چینل کو انٹرویو دیتے ہوئے انہوں نے کہا کہ حملے کے امکان کے حوالے سے کوئی پیش گوئی کرنا مشکل ہے تاہم وائٹ ہاؤس ایران کے مؤقف کو سنجیدگی سے لے رہا ہے۔ ان کا کہنا تھا کہ ایران کے لیے ہمارا پیغام پہلے بھی یہی تھا اور یہی رہے گا کہ ایسا نہ کریں اس مسئلے کو طول دینے کی کوئی وجہ نہیں ہے، اور اگر ایسا ہوا تو اسرائیل کے دفاع کے لیے تیار ہوں گے، اسی وجہ سے ہم نے خطے میں اپنی افواج میں اضافہ کر دیا ہے۔
مذاکرات میں تعطل کے لیے کسی بھی فریق کو ذمہ دار ٹھہرانے سے انکار کرتے ہوئے جان کربی کا کہنا تھا کہ معاہدے کے لیے اسرائیل اور حماس کی جانب سے سمجھوتہ کی ضرورت ہے تاہم فریقین ابھی بھی مصروف عمل ہیں اور یہ ایک اچھی بات ہے۔ جان کربی نے 10 ماہ سے جاری غزہ جنگ کے خاتمے اور 108 اسرائیلی یرغمالیوں کی رہائی کے لیے ممکنہ جنگ بندی معاہدے کے حوالے سے مثبت امید کا اظہار کیا۔ انہوں نے کہا کہ یہ عمل “تعمیری” ہے اور وہ آنے والے دنوں میں دوحہ میں مزید بات چیت کے منتظر ہیں۔
41
