اسلام آباد ( بدلو نیوز ) وزیراعظم عمران خان نے پی ایس ایل سیزن 7 کیلئے نیک تمناؤں کا اظہار کرتے ہوئے کہا پی ایس ایل پاکستان کا بڑا برانڈ بن چکا ہے۔ تفصیلات کے مطابق وزیراعظم عمران خان سےسربراہ کامیاب جوان پروگرام عثمان ڈاراور دیگرکی ملاقات ہوئی ، ملاقات میں شاہین آفریدی اور عاقب جاوید شریک ہوئے ۔ وزیراعظم کو کامیاب جوان اسپورٹس ٹیلنٹ ہنٹ پروگرام پر بریفنگ دی گئی ، ٹیلنٹ ہنٹ پروگرام کےدوران ملنے والے فاسٹ باؤلر محمد زاہد بھی ملاقات میں موجود تھے۔ کامیاب جوان اسپورٹس ڈرائیو نے کرکٹ کا نیا ٹیلنٹ تلاش کر لیا ، محمد زاہد کو سیالکوٹ میں ٹیلنٹ ہنٹ پروگرام کے دوران منتخب کیا گیا۔
وزیراعظم نے کامیاب جوان اسپورٹس ڈرائیو سےنئے ٹیلنٹ کی تلاش پر مبارکباد دیتے ہوئے کہا پی ایس ایل نئے ٹیلنٹ کی تلاش میں اہم کردار ادا کر رہا ہے ، پی ایس ایل میں نئے ٹیلنٹ کو پرفارم کرتے دیکھ کر خوشی ہوتی ہے۔ عمران خان کا کہنا تھا کہ کوئی شک نہیں کہ پی ایس ایل پاکستان کا بڑا برانڈ بن چکا ہے، امید ہے پی ایس ایل سیزن 7 میں بہترین میچز دیکھنے کو ملیں گے۔ انھوں نے مزید کہا کہ حکومت ملک میں کھیلوں کے فروغ پر خصوصی توجہ دے رہی ہے، یقینی بنا رہےہیں کھلاڑیوں کے انتخاب میں میرٹ کی بالا دستی ہو۔
وزیراعظم نے کرکٹر شاہین آفریدی کی ورلڈ کپ میں کارکردگی کو سراہتے ہوئے قومی ٹیم، پی سی بی اور اور پی ایس ایل کیلئے نیک خواہشات کا بھی اظہار کیا۔ معاون خصوصی عثمان ڈار کا کہنا تھا کہ میچز کے دوران کامیاب جوان کے ہیروز کوخصوصی دعوت دی جائے گی۔
77
