یونائیٹڈ کو زلمی سے شکست

لاہور ( بدلو نیوز ) پی ایس ایل 7 کے 24ویں میچ میں پشاور زلمی نے اسلام آباد یونائیٹڈ کو 10 رنز سے شکست دے دی، اعظم خان کی 85 رنز کی دھواں دار اننگز بھی یونائیٹڈ کو شکست سے نہ بچاسکی۔ اسلام آباد یونائیٹڈ کی ٹیم 207 رنز کے تعاقب میں مقررہ اوورز میں 7 وکٹوں کے نقصان پر 196 رنز بناسکی، رحمان اللہ گرباز 46۔ رنز کے ساتھ نمایاں رہے.کپتان آصف علی 11 رنز بنا کر پویلین لوٹ گئے، فہیم اشرف 9 رنز بنا کر آؤٹ ہوئے۔ زلمی کی جانب سے سلمان ارشاد نے دو وکٹیں حاصل کیں جبکہ وہاب ریاض نے دو کھلاڑیوں کو پویلین کی راہ دکھائی۔ اس سے قبل پشاور زلمی نے پہلے بیٹنگ کرتے ہوئے مقررہ اوورز میں 8 وکٹوں کے نقصان پر 206 رنز بنائے اور یونائیٹڈ کو جیت کے لیے 207 رنز کا ہدف دیا تھا۔ اوپنر بلے باز محمد حارث نے 32 گیندوں پر 70 رنز کی جارحانہ اننگز کھیلی۔

اسلام آباد یونائیٹڈ کی ٹیم میں پانچ تبدیلیاں کی گئی ہیں، یونائیٹڈ کپتان شاداب خان اور الیکس ہیلز کی خدمات سے محروم ہیں، زلمی نے ایک تبدیلی کرتے ہوئےمحمد عمر کی جگہ یاسر خان کو اسکواڈ کا حصہ بنایا ہے۔زلمی کے کپتان وہاب ریاض کا کہنا تھا کہ 175 پلس اسکورکرکےحریف ٹیم کو دباؤ میں لائیں گے، میچ میں پوری قوت لگائیں گے۔ شاداب خان کی انجری کے باعث اسلام آباد کی قیادت سنبھالنے والے آصف علی کا کہنا تھا کہ ٹیم میں پانچ تبدیلیاں کی ہیں،کچھ کھلاڑیوں کی واپسی ہوئی ہے، تمام کھلاڑی پرفارم کرکےآئیں گے، پی ایس ایل میں اچھا موقع ہے۔ اسلام آباد یونائیٹڈ کے کپتان آصف علی کا کہنا تھا کہ اگر ضرورت پڑی تو بولنگ بھی کروں گا۔