لاہور ( بدلو نیوز ) پاکستان سپر لیگ (پی ایس ایل) کے ساتویں ایڈیشن کیلئے لاہور قلندرز کی کپتانی کا سہرا شاہین شاہ آفریدی کے سر سج گیا۔ تفصیلات کے مطابق لاہور قلندرز کے چیف ایگزیکٹو آفیسر (سی ای او) ثمین رانا کے مطابق پی ایس ایل کے ساتویں ایڈیشن میں لاہور قلندرز کی قیادت پاکستان کرکٹ ٹیم کے مایہ ناز نوجوان فاسٹ باؤلر شاہین شاہ آفریدی کریں گے۔
اس سے قبل ٹیم کی قیادت سہیل اختر کے پاس تھی جو فرنچائز کیلئے سب سے کامیاب کپتان ثابت ہوئے اور ٹیم نے لیگ میں اپنا واحد فائنل میچ بھی ان کی قیادت میں ہی کھیلا تھا۔ یہاں یہ امر قابل ذکر ہے کہ شاہین شاہ آفریدی پی ایس ایل سکس میں سہیل اختر کے نائب کپتان تھے۔ واضح رہے کہ شاہین شاہ آفریدی نے لیگ کے تیسرے ایڈیشن میں لاہور قلندرز کو جوائن کیا تھا جس کے بعد وہ عمدہ کارکردگی کا مظاہرہ کرتے رہے ہیں۔ شاہین شاہ آفریدی لاہور قلندرز کی جانب سے سب سے زیادہ وکٹیں لینے والے باؤلر ہونے کے ساتھ ساتھ لیگ میں سب سے زیادہ وکٹیں لینے والے ساتویں باؤلر بھی ہیں۔
56
