ماؤنٹ منگنوئی ( ویب ڈیسک ) بنگلا دیش نے نیوزی لینڈ کو ماؤنٹ منگنوئی ٹیسٹ میں شکست دے کر تاریخ رقم کردی ہے۔ تفصیلات کے مطابق ماونٹ منگنوئی میں کھیلے گئے پہلے ٹیسٹ میچ میں بنگال ٹائیگرز نے میزبان ٹیم کے خلاف 8 وکٹ سے کامیابی حاصل کی،اسی تاریخی فتح کے ساتھ بنگال ٹائیگرز نیوزی لینڈ میں پہلی مرتبہ اور ہوم گراؤنڈ سے باہر چھٹی مرتبہ کوئی ٹیسٹ جیتنے میں کامیاب ہوا ہے۔
ما
ونٹ منگنوئی میں کھیلے گئے پہلے ٹیسٹ میں عبادت حسین کی تباہ کن بولنگ کی بدولت نیوزی لینڈ اپنی دوسری اننگز میں 169 رنز پر ڈھیر ہوگئی، بنگلا دیشی فاسٹ بولر نے 6 کھلاڑیوں کو پویلین کی راہ دکھائی، بنگلا دیش کو جیت کے لیے 40 رنز کا ہدف ملا تھا جو اس نے محض 2 وکٹ کے نقصان پر حاصل کرلیا۔ ٹیسٹ میچ کی یہ جیت اس لیے بھی تاریخی اہمیت کی حامل بن گئی ہے کیونکہ 10 سال بعد پہلی مرتبہ کسی ایشین ٹیم نے نیوزی لینڈ میں کوئی ٹیسٹ جیتا ہے، اس سے قبل پاکستان نے جنوری 2011 میں ہملٹن ٹیسٹ جیتا تھا، ہملٹن میں پاکستان کی فتح کے بعد ایشین ٹیموں نے نیوزی لینڈ میں 19 ٹیسٹ کھیلے جن میں سے 16 ہارے اور 3 ڈرا ہوئے۔ جبکہ بنگلا دیش کے لیے یہ جیت اس لیے بھی اہمیت کی حامل ہے کیونکہ اس نے پہلی بار نیوزی لینڈ کو ٹیسٹ میچ میں شکست دی ہے، دونوں ٹیموں کے درمیان سیریز کا دوسرا اور آخری ٹیسٹ میچ 9 جنوری سے کھیلا جائے گا۔
